A 7ª edición do monográfico forestal Galiforest celebrarase do 27 ao 29 de xuño no Centro de Formación e Experimentación Agroforestal de Sergude, Boqueixón (A Coruña).
Tras os excelentes resultados da súa pasada cita, Galiforest consolidouse xa como a maior feira forestal de España. Un referente para o sector que se prepara para celebrar o seu encontro máis ambicioso.
Unha sétima edición cuxos obxectivos principais céntranse en continuar cunha progresión que é imparable tanto nas súas cifras como na calidade da súa proposta, e tamén en avanzar nunha crecente internacionalización que permitiu xa obter para 2022 a internacionalidade a efectos aduaneiros do Ministerio de Industria e agora solicitar a súa concesión completa para 2024.
Todo iso, co monte como escenario, traducirase durante tres días na creación dun punto de encontro excepcional para empresas e profesionais, a todos os niveis e para todos os elos da cadea monte-industria.
Pode solicitar unha invitación, enviando un correo electrónico a xera.cmr [at] xunta.gal (xera[dot]cmr[at]xunta[dot]gal)
IFEMA, Madrid do 19 ao 21 de marzo do 2024
A sétima edición de REBUILD será un gran cume da industrialización en España, sendo un punto de encontro para todos os actores da edificación que buscan solucións de automatización, dixitais e sostibles.
Está previsto que acudan máis de 24.000 profesionais da cadea de valor do ámbito da arquitectura, arquitectura técnica, enxeñería, construción, promoción, instalación, reforma, deseño de interiores e investimento.
No marco do cume, terá lugar o Congreso Nacional de Arquitectura Avanzada e Construción 4.0, un foro de coñecemento e tendencias cun programa de conferencias que reunirá a grandes nomes que son referentes na industria e que contará cunha axenda específica de Construción en Madeira.
Presentación do Informe Anual da Cadea Monte Industria, o mércores 13 de decembro ás 10:45h no Museo Pedagóxico de Galicia (MUPEGA), Rúa de San Lázaro 107 en Santiago de Compostela.
O venres 3 de febreiro ás 10:00h, no Auditorio Carlos V do Hotel Monumento San Francisco en Santiago de Compostela, terá lugar o Acto de presentación das intervencións realizadas no patrimonio en madeira da Catedral de Santiago no marco da colaboración entre a Fundación Catedral e a Axencia Galega da Industria Forestal para a contribución á conservación do rico patrimonio en madeira que alberga o templo.
A Fundación Arume organiza o martes 25 de outubro o Encontro Piñeiros 22, que se desenvolverá no auditorio do Edificio Fontán, na Cidade da Cultura (Santiago de Compostela). Tras o éxito da primeira edición de Piñeiros, celebrada o pasado ano, esta segunda edición parte cun enfoque transnacional e congregará destacados profesionais e investigadores de España e Portugal.
O Encontro Piñeiros 22, que leva este ano por lema A cooperación Galicia-Portugal, abordará como principais eixes temáticos dúas cuestións claves: a sostibilidade do recurso en monte, que é un dos grandes desafíos do sector, e a tendencia en auxe da construción en madeira, que representa unha oportunidade para toda a cadea forestal.
O evento, que está cofinanciado pola Axencia Galega da Industria Forestal (XERA), poderase seguir de xeito presencial ou on line.
A sexta edición do monográfico forestal Galiforest Abanca celebrarase do 30 de xuño ao 2 de xullo no monte e instalacións do Centro de Formación e Experimentación Agroforestal de Sergude (Boqueixón).
A área expositiva contará con presenza das firmas máis importantes do sector que amosarán as súas últimas innovacións tecnolóxicas e novos proxectos.
De forma paralela á exposición o certame ofrecerá un amplo programa de xornadas técnicas e demostracións continuadas de traballo en monte dirixidas a profesionais do sector así como a outros perfís relacionados como os estudantes vinculados co sector.